Tbilisi

Tbilisi (Georgies: თბილისი [tʰˈbiliˌsi] ) is die hoofstad van Georgië. Met 'n bevolking van 1,15 miljoen in 2010 en 'n oppervlakte van 726 km² (waarvan 70 km² beboude gebiede) is dit die grootste en mees bevolkte stad in die land.

Tbilisi თბილისი
Kaart	Wapen
	Vlag
Land	Georgië
Koördinate	41°43′N 44°48′O / 41.717°N 44.800°O / 41.717; 44.800
Gestig in	4de eeu v.C.
Oppervlakte:
- Totaal	726 vk km
Hoogte bo seevlak	380–770 m
Bevolking:
- Totaal (2010)	1 152 505
- Bevolkingsdigtheid	1 587/vk km
- Metropolitaanse gebied	1 313 878
Tydsone	UTC +04:00
Klimaat
- Tipe	Gematigde klimaat
- Gemiddelde jaarlikse temperatuur	12,6 °C
- Gem. temp. Januarie/Julie	0,5 / 24,2 °C
- Gemiddelde jaarlikse neerslae	518 mm
Burgemeester	Kakha Kaladze
Amptelike webwerf	tbilisi.gov.ge

Geografie

Geografiese ligging

Tbilisi se historiese stadsentrum

Tbilisi is in die sentrale gedeelte van die Kaukasus-landengte in Oos-Georgië geleë. Dit strek oor 'n afstand van 21 kilometer langs die Koera-rivier (Georgies Mtkwari). Die stad word in die weste deur die bergpiek Mtazminda, in die ooste deur die Machata-heuwelketting, in die suide deur die Mtabori- en Solalaki-gebergtes begrens. Vanweë sy bergagtige reliëf is die stadsgebied teen hoogtes van tussen 380 en 727 meter bo seevlak geleë. Talle woonbuurte is op terrasse teen die skuinstes van berghellings gebou.

As hoofstad van Georgië is Tbilisi aan die nege administratiewe distrikte van die land gelykgestel.

Klimaat

Tbilisi is in 'n gematigde subtropiese klimaatstreek met min bewolktheid en 'n gemiddeld van meer as 2 100 sonskynure regdeur die jaar. Die gemiddelde jaarlikse temperatuur is 12,6 °C, met uiterstes van -23 °C in die winter- en 40 °C in die somermaande.

Die gemiddelde jaarlikse reënval is tussen 450 en 650 mm, waarby Mei die natste maand van die jaar is. Swaar donderbuie sak hoofsaaklik in Mei en Junie oor Tbilisi uit. Sneeuvalle van tussen 1 en 10 sentimeter kom in die algemeen tussen November en April voor, tog kan sneeulae uiterstes van tussen 30 en 40 sm bereik.

Natuurverskynsels

Georgië is in 'n seismies aktiewe gebied geleë sodat ook Tbilisi verskeie kere deur aardbewings geraak is. Die laaste groot aardskudding, wat 4,8 op die Richterskaal gemeet het, het Tbilisi op 25 April 2002 geruk en ses menselewens geëis. Meer as 10 000 geboue is beskadig, hoofsaaklik in ouer stadsdele soos Mtazminda, Tsjoeghoereti, Isani en Krtsanisi, en meer as 60 miljoen VSA-$ se skade is aangerig.

Verwysings

1. (en) www.tbilisi.gov.ge: Climate Geargiveer 14 Januarie 2012 op Wayback Machine

Eksterne skakels

• Wikimedia Commons het meer media in die kategorie Tbilisi.
• (en) Toerisme-inligting oor Tbilisi op Wikivoyage
• (ka) Amptelike webwerf